🕊️ Ang mga pagbasa sa ibaba ay bahagi ng opisyal na Liturgiya ng Salita sa Simbahang Katolika. Ibinahagi ito dito upang makatulong sa pagninilay ng mga mambabasa. Ang mga teksto ay hango sa Awit at Papuri.

Biyernes, Oktubre 10, 2025

Friday of the Twenty-seventh Week in Ordinary Time (Green)

UNANG PAGBASA
Joel 1, 13-15; 2, 1-2

Pagbasa mula sa aklat ni propeta Joel

Magluksa kayo at tumangis, mga saserdoteng naghahandog ng haing susunugin sa dambana ng Panginoon, pumasok kayo sa templo at manatili roong magdamag na nakasuot ng sako.

Walang trigo o alak na ihahandog sa dambana ng inyong Diyos.

Iutos ninyo na mag-ayuno ang lahat.

Tawagin ninyo ang mga tao upang sumamba.

Tipunin ninyo ang matatanda at lahat ng taga-Juda, pumasok kayo sa templo ng Panginoon na inyong Diyos at sumamo sa kanya.

Malapit na ang Araw ng Panginoon at magaganap ang pagkawasak na likha ng kanyang kamay.

Kalagim-lagim ang araw na yaon!

Hipan ninyo ang trompeta, ibigay ang hudyat sa Sion, sa banal na burol ng Diyos.

Manginig ang lahat ng nananahan sa Juda, dumating na ang Araw ng Panginoon.

Ito’y makulimlim at malungkot na araw, madilim ang buong paligid; at lumitaw ang napakakapal na balang tulad ng paglaganap ng liwanag sa kabundukan kung nagbubukang-liwayway.

Hindi pa nangyayari ang ganito nang mga nakaraang panahon at hindi na mangyayari pang muli.

Ang Salita ng Diyos.

SALMONG TUGUNAN
Salmo 9, 2-3. 6 at 16. 8-9

Makatarungang paghatol
ang igagawad ng Poon.

O Panginoon ko, buong puso kitang pasasalamatan,
ang kahanga-hangang ginawa mo, Poon, aking isasaysay;
dahilan sa iyo, ako ay aawit na may kagalakan,
pupurihin kita, Panginoon naming Kataas-taasan.

Makatarungang paghatol
ang igagawad ng Poon.

Iyong hinatulan yaong mga Hentil at mga balakyot,
alaala nila sa balat ng lupa’y pinawi mong lubos.
Itong mga Hentil, nahulog sa hukay na ginawa nila,
sa kanilang bitag na umang sa akin, ang nahuli’y sila.

Makatarungang paghatol
ang igagawad ng Poon.

Dapat kilalaning Haring walang hanggan itong Panginoon,
kanyang itinatag yaong kaniyang trono, upang doon humatol.
Ang pamamahala niya sa daigdig, pawang naaayon
sa makatarungan niyang pagpapasiya, bilang isang hukom.

Makatarungang paghatol
ang igagawad ng Poon.

ALELUYA
Juan 12, 31b-32

Aleluya! Aleluya!
Si Kristo ay itinampok,
sa kanya tayo’y dumulog,
kasamaan ay natapos.
Aleluya! Aleluya!

MABUTING BALITA
Lucas 11, 15-26

Ang Mabuting Balita ng Panginoon ayon kay San Lucas

Noong panahong iyon, matapos palayasin ni Hesus ang isang demonyo, nanggilalas ang mga tao. Ngunit may ilan sa kanila ang nagsabi, “Si Beelzebul na prinsipe ng mga demonyo ang nagbigay sa kanya ng kapangyarihang magpalayas ng mga demonyo.” May iba namang nais siyang subukin, kaya’t nagsabi, “Magpakita ka ng kababalaghang magpapakilala na ang Diyos ang sumasaiyo.” Ngunit batid ni Hesus ang kanilang iniisip, kaya’t sinabi sa kanila, “Babagsak ang bawat kahariang nahahati sa magkakalabang pangkat at mawawasak ang mga bahay roon. Kung maghimagsik si Satanas laban sa kanyang sarili, paano mananatili ang kanyang kaharian? Sinasabi ninyong nagpapalayas ako ng mga demonyo sapagkat binigyan ako ni Beelzebul ng kapangyarihang ito. Kung ako’y nagpapalayas ng mga demonyo sa pamamagitan ni Beelzebul, sino naman ang nagbigay ng kapangyarihan sa inyong mga tagasunod na makagawa ng gayun? Sila na rin ang nagpapatunay na maling-mali kayo. Ngayon, kung ako’y nagpapalayas ng mga demonyo sa pamamagitan ng kapangyarihan ng Diyos, nangangahulugang dumating na sa inyo ang paghahari ng Diyos.

“Kapag ang isang taong malakas at nasasandatahan ay nagbabantay sa kanyang bahay, malayo sa panganib ang kanyang ari-arian. Ngunit kung salakayin siya at talunin ng isang taong higit na malakas, sasamsamin nito ang mga sandatang kanyang inaasahan at ipamamahagi ang ari-ariang inagaw.

“Ang hindi panig sa akin ay laban sa akin, at nagkakalat ang hindi tumutulong sa aking mag-ipon.

“Kapag lumabas na mula sa tao ang isang masamang espiritu, ito’y gumagala sa mga tigang na lugar at naghahanap ng mapagpapahingahan. Kung walang matagpuan ay sasabihin nito sa sarili, ‘Babalik ako sa bahay na aking pinanggalingan.’ Pagbabalik ay matatagpuan niyang malinis na ang bahay at maayos. Kaya, lalabas siyang muli at magsasama ng pito pang espiritung masasama kaysa kanya, at papasok sila at maninirahan doon. Kaya’t sumasama kaysa dati ang kalagayan ng taong iyon.”

Ang Mabuting Balita ng Panginoon.

Source: Awit at Papuri

Reflection

“Ang hindi panig sa akin ay laban sa akin.” (Lucas 11:23)

Sa Ebanghelyo ngayon, ipinapakita ni Jesus na walang “neutral zone” pagdating sa pananampalataya. Hindi puwedeng kalahating puso lamang sa Diyos. Ang sino mang hindi tahasang panig kay Kristo ay, sa katunayan, kumakalaban sa Kanya.

Sa panahon ni Jesus, may mga taong nakakita ng Kanyang mga himala ngunit nagduda pa rin. Sa halip na kilalanin ang kapangyarihan ng Diyos, sinabi nilang kay Beelzebul, prinsipe ng mga demonyo, nanggagaling ang Kanyang kapangyarihan. Ipinakita rito ang kabiguan nilang makakita ng kabutihan dahil puno ng inggit at takot ang kanilang puso.

Tulad din nila, tayo ay tinatawag araw-araw na pumili. Hindi ito palaging madali. Maraming pagkakataon na tila mas “komportable” ang manahimik o umiwas sa paninindigan para sa tama. Ngunit kapag nanahimik tayo sa harap ng kasamaan, dahan-dahan tayong nalalayo sa liwanag ni Kristo.

Ang tunay na Kristiyano ay hindi lamang naniniwala, kundi lumalaban para sa kabutihan. Tinatawag tayong ipagtanggol ang katotohanan, magpatawad sa kabila ng sakit, at maglingkod kahit walang kapalit. Ang lahat ng ito ay mga paraan ng pagiging “panig kay Kristo.”

Tulad ng sinasabi sa unang pagbasa (Joel 1:13–15; 2:1–2), ang Araw ng Panginoon ay paparating — isang paalala na darating ang oras ng paghuhukom. Kaya habang may panahon pa, tayo’y manindigan, magsisi, at magbalik-loob. Ang Espiritu Santo ang nagbibigay sa atin ng lakas upang huwag magapi ng tukso.

Sa dulo, tandaan natin: Ang bahay na walang laman — ang pusong walang Diyos — ay madaling mapuno muli ng kasamaan. Kaya punuin natin ito ng pag-ibig, panalangin, at kabutihan upang hindi na makabalik ang masasamang espiritu sa ating buhay.

Personal Reflection

Ngayon, tinatanong ako ni Kristo: “Kanino ka panig?”
Hindi sapat na sabihing “Mabuti naman ako” o “Hindi naman ako gumagawa ng masama.” Ang tanong ay — aktibo ba akong sumusunod sa kalooban ng Diyos? May ginagawa ba akong mabuti, o nananatili lamang akong walang kibo?

Ang hamon sa akin ngayon ay linisin hindi lang ang aking puso kundi punuin ito ng Espiritu ng Diyos. Kasi kapag walang laman ang puso, mabilis itong masakop ng tukso at kalungkutan.

Prayer

Panginoong Hesus,
Salamat sa Iyong salita na nagbibigay liwanag sa gitna ng dilim.
Linisin Mo ang aking puso at punuin ito ng Iyong Espiritu.
Huwag Mong hayaan na maging malamig o walang paninindigan ang aking pananampalataya.
Tulungan Mo akong maging tapat sa Iyo sa bawat desisyon, sa bawat salita, at sa bawat gawa.
Nawa’y sa araw-araw, piliin ko ang panig ng kabutihan,
ang panig ng Iyong kaharian na walang hanggan.
Amen. ✝️

🙏 Support Tinapay ng Buhay

Ang inyong munting tulong ay malaking biyaya upang magpatuloy ang aming layunin na magbahagi ng Salita ng Diyos araw-araw.
“The Lord loves a cheerful giver.” (2 Cor 9:7)

📜 Ang lahat ng pagbasa ay hango sa opisyal na Lectionary ng Simbahang Katolika sa pamamagitan ng Awit at Papuri. Ang layunin ng Tinapay ng Buhay ay makapagbigay ng pagninilay upang mapalalim ang pagkaunawa ng mga mambabasa sa Salita ng Diyos.