🕊️ Ang mga pagbasa sa ibaba ay bahagi ng opisyal na Liturgiya ng Salita sa Simbahang Katolika. Ibinahagi ito dito upang makatulong sa pagninilay ng mga mambabasa. Ang mga teksto ay hango sa Awit at Papuri.
Martes, Nobyembre 4, 2025
Martes ng Ika-31 Linggo sa Karaniwang Panahon (I)
UNANG PAGBASA
Roma 12, 5-16a
Pagbasa mula sa sulat ni Apostol San Pablo sa mga taga-Roma
Mga kapatid, tayo’y marami ngunit nabubuo sa iisang katawan ni Kristo, at isa’t isa’y bahagi ng iba. Yamang mayroon tayong mga kaloob na magkakaiba ayon sa kagandahang-loob ng Diyos sa atin, gamitin natin ang mga kaloob na iyan. Kung pagpapahayag ng kalooban ng Diyos ang ipinagkaloob sa atin, ipahayag natin ito ayon sa sukat ng ating pananampalataya; kung paglilingkod, maglingkod tayo. Magturo ang tumanggap ng kaloob na pagtuturo at mangaral ang may kaloob na pangangaral. Kung pag-aabuloy, mag-abuloy nang buong kaya; kung pamumuno, mamuno nang buong sikap. Kung nagkakawanggawa, gawin ito nang buong galak.
Maging tunay ang inyong pag-ibig. Kasuklaman ninyo ang masama, pakaibigin ang mabuti. Mag-ibigan kayo na parang tunay na magkakapatid. Pahalagahan ninyo ang iba nang higit sa pagpapahalaga nila sa inyo. Magpakasipag kayo at buong pusong maglingkod sa Panginoon. Magalak kayo sa inyong kapighatian, at laging manalangin. Tumulong kayo sa pangangailangan ng mga kapatid. Ibukas ninyong lagi ang inyong pinto sa mga taga-ibang lugar.
Idalangin ninyo ang mga umuusig sa inyo – idalanging pagpalain at huwag sumpain. Makigalak kayo sa mga nagagalak, makitangis sa mga tumatangis. Magkaisa kayo ng loobin.
Ang Salita ng Diyos.
SALMONG TUGUNAN
Salmo 130, 1. 2. 3
Sa iyong kapayapaan,
D’yos ko, ako’y alagaan.
O Panginoon ko, ang pagmamataas,
Tinalikdan ko na at iniwang ganap;
Ang mga gawain na magpapatanyag
Iniwan ko na rin, di ko na hinangad.
Sa iyong kapayapaan,
D’yos ko, ako’y alagaan.
Mapayapa ako at nasisiyahan,
tulad niyong sanggol sa bisig ni Inay.
Sa iyong kapayapaan,
D’yos ko, ako’y alagaan.
Kaya mula ngayon, ikaw, O Israel,
sa ’yong Panginoon, magtiwalang tambing!
Sa iyong kapayapaan,
D’yos ko, ako’y alagaan.
ALELUYA
Mateo 11, 28
Aleluya! Aleluya!
Kayong mabigat ang pasan
ay kay Hesus maglapitan
upang kayo’y masiyahan.
Aleluya! Aleluya!
MABUTING BALITA
Lucas 14, 15-24
Ang Mabuting Balita ng Panginoon ayon kay San Lucas
Noong mga panahong iyon, sinabi kay Hesus ng isa sa mga kasalo niya sa hapag, “Mapalad ang makakasalo sa hapag sa kaharian ng Diyos!” Sumagot si Hesus, “May isang lalaking naghanda ng isang malaking piging, at marami siyang inanyayahan. Nang dumating ang oras ng piging, inutusan niya ang kanyang mga alipin at ipinasabi sa mga inanyayahan, ‘Halina kayo, handa na ang lahat!’ Ngunit nagdahilan silang lahat. Ang sabi ng una, ‘Nakabili ako ng bukid, at kailangan kong puntahan. Kayo na sana ang bahalang magpaumanhin sa akin.’ At sinabi ng isa, ‘Nakabili ako ng limang pares na baka, at kailangan kong isingkaw para masubok. Kayo na sana ang bahalang magpaumanhin sa akin.’ Sinabi naman ng isa pa, ‘Bagong kasal ako kaya hindi ako makakadalo.’ Bumalik ang alipin at ibinalita ito sa kanyang panginoon. Nagalit ito at sinabi sa alipin, ‘Lumabas kang madali sa mga lansangan at makikipot na daan ng lungsod, at isama mo rito ang mga pulubi, mga pingkaw, mga bulag, at mga pilay.’ Pagbabalik ng alipin ay sinabi niya, ‘Panginoon, nagawa na po ang iniutos ninyo, ngunit maluwag pa.’ Kaya’t sinabi ng panginoon sa alipin, ‘Lumabas ka sa mga lansangan at sa mga landas, at pilitin mong pumarito ang mga tao, upang mapuno ang aking bahay. Sinasabi ko sa inyo: isa man sa mga unang inanyayahan ay hindi makatitikim ng aking handa!’”
Ang Mabuting Balita ng Panginoon.
Source: Awit at Papuri
Reflection
Mga ka Tinapay at mga kapatid ko kay Kristo, ang ating mga pagbasa ngayon ay puno ng paanyaya, paanyaya ng Diyos sa pag-ibig, pagkakaisa, at pagtugon sa Kanyang biyaya.
Sa Unang Pagbasa, tinuturuan tayo ni San Pablo kung paano maging isang tunay na miyembro ng katawan ni Kristo: bawat isa ay may kani-kaniyang kaloob at tungkulin, at lahat ay dapat gamitin para sa kabutihan ng iba.
Sa Ebanghelyo naman ni San Lucas, maririnig natin ang talinghaga tungkol sa malaking piging, kung saan marami ang inanyayahan ngunit iilan lamang ang tumugon.
Sa dalawang pagbasa, makikita natin ang parehong mensahe: Ang Diyos ay patuloy na nag-aanyaya, ngunit tayo ba ay handang tumugon?
Pagninilay sa Unang Pagbasa (Roma 12:5–16a)
Sabi ni San Pablo:
“Tayo’y marami ngunit nabubuo sa iisang katawan ni Kristo.”
Napakagandang larawan ito ng simbahan. Iba-iba tayo, may mayaman at mahirap, may matalino at simple, may malakas at mahina, pero sa mata ng Diyos, iisa lang ang ating layunin: ang magmahal at maglingkod.
Sa mundo ngayon, madalas nating sukatin ang halaga ng isang tao batay sa posisyon, talento, o kakayahan. Ngunit sa Diyos, walang maliit na tungkulin. Ang lahat ng gawain, kapag ginawa nang may pag-ibig, ay may kahulugan.
Ang paglilinis ng simbahan, ang pagtulong sa kapitbahay, ang pag-aalaga sa anak, ang pagngiti sa kapwa, lahat ng ito ay paraan ng paglilingkod kay Kristo.
Ang mahalaga ay gawin natin ito nang may galak at tapat na puso.
Totoo ring mahirap minsan ang makiisa sa iba, may mga tampuhan, may hindi pagkakaunawaan, pero doon pumapasok ang biyaya ng Espiritu Santo.
Kapag pinairal natin ang pag-ibig, sinisira nito ang mga pader ng pagmamataas, at nagiging daan ng kapayapaan.
Pagninilay sa Ebanghelyo (Lucas 14:15–24)
Mga kapatid ko kay Kristo ang talinghaga ng malaking piging ay isang makapangyarihang paalala sa atin.
Isang lalaking naghanda ng maringal na handaan na simbolo ng kaharian ng Diyos. Inanyayahan niya ang marami, ngunit lahat ay nagdahilan.
Isa’y abala sa negosyo, isa’y may biniling baka, isa nama’y bagong kasal. Sa madaling salita, lahat ay masyadong busy para sa Diyos.
Mga Kapatid, ang mga paanyaya ng Diyos ay araw-araw maging sa panalangin, sa pagbabasa ng Kanyang Salita, sa pagtulong sa kapwa. Ngunit gaano kadalas natin Siyang sinasabing, “Sandali lang, Panginoon, marami pa akong kailangang ayusin”?
Mga Ka Tinapay ng Buhay, habang pinipili nating unahin ang mga bagay ng mundo, unti-unti tayong lumalayo sa handa ng Diyos, ang buhay na ganap at masagana.
Kaya’t nga mga kapatid pinadala ng Panginoon ang kanyang mga alipin upang anyayahan ang mga pulubi, mga pilay, at mga bulag sila ang mga itinakwil ng lipunan.
Dito ipinapakita ni Jesus na ang Kaharian ng Diyos ay para sa mga mapagpakumbaba, para sa mga pusong marunong tumugon.
Hindi sapat na marinig ang paanyaya; kailangan din nating sumagot at kumilos.
Aral ng Ebanghelyo
- Ang Diyos ay patuloy na nag-aanyaya.
Ang misa, panalangin, kabutihan, ang lahat ng ito ay imbitasyon sa Kanyang hapag. - Maraming dahilan ang pumipigil sa atin.
Abala, takot, o kakulangan ng oras. Pero tandaan natin na laging may oras para sa Diyos kung Siya ang ating prioridad. - Ang mga handang tumugon ay ang mga kababaang-loob.
Ang mga marunong umamin na sila’y nangangailangan ng Diyos, sila ang unang pinupuno ng Kanyang biyaya.
Personal Reflection
“Panginoon, napakaraming paanyaya Mong dumating sa buhay ko, minsan sa anyo ng tulong sa iba, minsan sa katahimikan ng dasal, minsan sa salita ng pag-ibig. Pero madalas, tinatanggihan ko dahil sa aking pagiging abala.
Ngayong araw, turuan Mo akong maging bukas sa Iyong tawag.
Tulungan Mo akong tanggapin ang Iyong paanyaya, hindi lang sa salita, kundi sa gawa, upang sa bawat araw, ako’y makasalo sa Iyong hapag ng biyaya.”
Manalangin Tayo
Panginoong Diyos, salamat sa Iyong walang sawang paanyaya.
Patawarin Mo kami sa mga sandaling mas pinili naming ang mga bagay ng mundo kaysa sa Iyong pagmamahal.
Gisingin Mo ang aming mga puso upang maging tapat na tumugon sa Iyong biyaya.
Tulungan Mo kaming maging mapagkumbaba at mapaglingkod sa aming kapwa.
Nawa’y maging buhay naming handaan ng kabutihan ang aming pag-iral.
Sa pamamagitan ni Kristo na aming Panginoon. Amen.
🙏 Support Tinapay ng Buhay
Ang inyong munting tulong ay malaking biyaya upang magpatuloy ang aming layunin na
magbahagi ng Salita ng Diyos araw-araw.
“The Lord loves a cheerful giver.” (2 Cor 9:7)
📜 Ang lahat ng pagbasa ay hango sa opisyal na Lectionary ng Simbahang Katolika sa pamamagitan ng Awit at Papuri. Ang layunin ng Tinapay ng Buhay ay makapagbigay ng pagninilay upang mapalalim ang pagkaunawa ng mga mambabasa sa Salita ng Diyos.