🕊️ Ang mga pagbasa sa ibaba ay bahagi ng opisyal na Liturgiya ng Salita sa Simbahang Katolika. Ibinahagi ito dito upang makatulong sa pagninilay ng mga mambabasa. Ang mga teksto ay hango sa Awit at Papuri.

Linggo, Oktubre 12, 2025

Twenty-eighth Week in Ordinary Time (Green)
Indigenous Peoples’ Sunday
Extreme Poverty Day

UNANG PAGBASA
2 Hari 5, 14-17

Pagbasa mula sa ikalawang aklat ng mga Hari

Noong mga araw na iyon, si Naaman ay lumusong sa Ilog Jordan at lumubog ng pitong ulit. At tulad ng sinabi ni Eliseo, nanauli sa dati ang kanyang katawan at kuminis mula sa ketong ang kanyang balat, tulad ng balat ng sanggol.

Si Naaman at ang kanyang mga kasama ay nagbalik kay Eliseo. Sinabi niya, “Ngayo’y napatunayan kong walang ibang diyos sa ibabaw ng lupa kundi ang Diyos ng Israel. Narito, pagdamutan ninyo itong maliit kong nakayanan.”

Ngunit sinabi ni Eliseo, “Buhay ang Panginoong Diyos na aking pinaglilingkuran. Hindi ako tumatanggap kahit ano.” Pinilit siya ni Naaman ngunit nagpakatanggi-tanggi siya.

Dahil dito, sinabi ni Naaman, “Kung ayaw ninyo itong tanggapin, maari po ba namang kargahan ko ng lupa rito ang dalawa kong kabayo? Mula ngayon, hindi na ako maghahandog sa ibang diyos maliban sa Panginoon.”

Ang Salita ng Diyos.

SALMONG TUGUNAN
Salmo 97, 1. 2-3ab. 3kd-4

Panginoong nagliligtas
sa tanang bansa’y nahayag.

Umawit ng bagong awit at sa Poon ay ialay,
pagkat yaong ginawa n’ya ay kahanga-hanggang tunay!
Sa sariling lakas niya at taglay na kabanalan,
walang hirap na natamo yaong hangad na tagumpay.

Panginoong nagliligtas
sa tanang bansa’y nahayag.

Ang tagumpay niyang ito’y siya na rin ang naghayag,
sa harap ng mga bansa’y nahayag ang pagliligtas.
Ang pangako sa Israel lubos niyang tinutupad.

Panginoong nagliligtas
sa tanang bansa’y nahayag.

Tapat siya sa kanila at ang pag-ibig niya ay wagas.
Ang tagumpay ng ating Diyos kahit saan ay namalas!
Magkaingay na may galak, yaong lahat sa daigdig;
ang Poon ay buong galak na purihin sa pag-awit!

Panginoong nagliligtas
sa tanang bansa’y nahayag.

IKALAWANG PAGBASA
2 Timoteo 2, 8-13

Pagbasa mula sa ikalawang sulat ni Apostol San Pablo kay Timoteo

Pinakamamahal ko, alalahanin mo si Hesukristo, ang nagmula sa angkan ni David at ang muling nabuhay. Ito ang Mabuting Balitang ipinangangaral ko, ang dahilan ng aking pagdurusa hanggang sa magapos na tulad ng isang salarin. Ngunit hindi maigagapos ang salita ng Diyos. Pinagtitiisan ko ang lahat ng bagay alang-alang sa mga hinirang ng Diyos upang magtamo rin sila ng kaligtasang mula kay Kristo Hesus, at ng walang hanggang kaluwalhatian. Narito ang kasabihang mapananaligan:

“Kapag tayo’y namatay na kalakip ni Hesukristo,
walang salang mabubuhay na kasama niya tayo;
kung tayo man ay magtiis ng hirap sa mundong ito,
maghahari naman tayong kapiling ng ating Kristo;
kapag siya’y itinakwil sa harapan ng mga tao
pagdating ng takdang araw, itatakwil niya tayo.
Kung tayo ma’y hindi tapat, si Kristo ay tapat pa rin
sapagkat ang sa kanya ay hindi niya itatakwil.”

Ang Salita ng Diyos.

ALELUYA
1 Tesalonica 5, 18

Aleluya! Aleluya!
Ang D’yos Ama’y naghahangad
lagi tayong pasalamat
kaisa ng kanyang Anak.
Aleluya! Aleluya!

MABUTING BALITA
Lucas 17, 11-19

Ang Mabuting Balita ng Panginoon ayon sa San Lucas

Noong panahong iyon, sa paglalakbay ni Hesus patungong Jerusalem, nagdaan siya sa hangganan ng Samaria at Galilea. Nang papasok na siya sa isang nayon, siya’y sinalubong ng sampung ketongin. Tumigil sila sa malayu-layo at humiyaw ng: “Hesus! Panginoon! Mahabag po kayo sa amin!” Nang makita sila ay sinabi niya, “Humayo kayo at pakita sa mga saserdote.” At samantalang sila’y naglalakad, gumaling sila. Nang mapuna ng isa na siya’y magaling na, nagbalik siyang sumisigaw ng pagpupuri sa Diyos. Nagpatirapa siya sa paanan ni Hesus at nagpasalamat. Ang taong ito’y Samaritano. “Hindi ba sampu ang gumaling?” tanong ni Hesus. “Nasaan ang siyam? Wala bang nagbalik at nagpuri sa Diyos kundi ang dayuhang ito?” Sinabi ni Hesus sa kanya, “Tumindig ka’t humayo sa iyong lakad! Pinagaling ka dahil sa iyong pananalig.”

Ang Mabuting Balita ng Panginoon.

Source: Awit at Papuri

Reflection

Sa Ebanghelyo ngayon, sampung ketongin ang lumapit kay Jesus upang humingi ng awa. Lahat sila ay pinagaling, ngunit isa lamang ang nagbalik upang magpasalamat — at siya pa ay isang Samaritano, isang dayuhang hindi kabilang sa bayan ng Israel.

Ang kuwento ay nagpapaalala sa atin na madalas nating tanggapin ang biyaya ng Diyos nang hindi man lang nagpapasalamat. Tulad ng siyam, marami sa atin ang masaya kapag tinugon ang ating panalangin, ngunit nakakalimot sa pasasalamat pagkatapos.
Ang tunay na pananampalataya ay hindi lamang humihingi, kundi marunong ding magpasalamat at magbalik ng papuri sa Diyos.

Sa unang pagbasa, si Naaman, na banyaga rin, ay gumaling sa kanyang ketong matapos sumunod sa tagubilin ni Eliseo. Sa kanyang paggaling, kinilala niya na walang ibang Diyos kundi ang Diyos ng Israel. Parehong ipinapakita nina Naaman at ng Samaritano ang pananampalatayang puno ng kababaang-loob — handang sumunod, at marunong tumanaw ng utang na loob.

Sa ikalawang pagbasa, pinaaalala ni San Pablo kay Timoteo na kahit tayo’y magdusa, “ang salita ng Diyos ay hindi maigagapos.” Ang biyaya ng Diyos ay patuloy na kumikilos sa mga tapat, kahit sa gitna ng kahirapan at kawalang-katarungan.

Ngayong ipinagdiriwang natin ang Indigenous Peoples’ Sunday at Extreme Poverty Day, tayo’y inaanyayahang maging mapagpasalamat at makibahagi sa awa ng Diyos. Tulad ng sampung ketongin, marami rin sa ating mga kapatid na katutubo at mahihirap ang nananabik sa kagalingan — hindi lamang pisikal kundi espiritwal at panlipunan.
Tayo, bilang mga tumanggap ng biyaya, ay tinatawag na maging tinig ng kanilang pag-asa at kamay ng habag ng Diyos.

Personal Reflection

Ang pasasalamat ay bunga ng pagkilala. Kapag kinikilala natin na lahat ay biyaya ng Diyos, mas nagiging malalim ang ating pananampalataya.
Magandang pagnilayan: Ilang beses ba akong nagpasalamat kay Lord ngayong linggo?
At gaya ng Samaritano, kaya ko rin bang bumalik at magpasalamat hindi lang sa tagumpay, kundi pati sa mga pagsubok na nagturo sa akin ng kababaang-loob?

Manalangin Tayo

Panginoon, turuan Mo akong maging katulad ng gumaling na Samaritano—puspos ng pasasalamat at pananampalataya.
Tulungan Mo akong makita ang kabutihan Mo sa bawat sandali, lalo na sa mga taong madalas hindi pinapansin ng mundo.
Pagpalain Mo ang aming mga kapatid na katutubo at mga nasa kahirapan, nawa’y maramdaman nila ang Iyong kalinga at hustisya.
Amen. 🙏

🙏 Support Tinapay ng Buhay

Ang inyong munting tulong ay malaking biyaya upang magpatuloy ang aming layunin na magbahagi ng Salita ng Diyos araw-araw.
“The Lord loves a cheerful giver.” (2 Cor 9:7)

📜 Ang lahat ng pagbasa ay hango sa opisyal na Lectionary ng Simbahang Katolika sa pamamagitan ng Awit at Papuri. Ang layunin ng Tinapay ng Buhay ay makapagbigay ng pagninilay upang mapalalim ang pagkaunawa ng mga mambabasa sa Salita ng Diyos.